Keçmiş səfirlər
Cəlil Sadıxov
Cəlil Sadıxov Azərbaycanın Ukraynada ilk diplomatik nümayəndəsi olmuş, 10 oktyabr 1918-ci il tarixində Kiyevdə yaradılmış Azərbaycanın Ukraynada komissarlığına rəhbərlik etmişdir. Komissarlıq Kiyev şəhəri Provorovska küçəsi 15 ünvanında fəaliyyət göstərmişdir. Cəlil Sadıxovun köməkçisi Yusif Salehov, katib Mir Cəlal Mirtağıyev və diplomatik kuryer Məmməd Tağı Sultanov 1910-cu illərdə Müqəddəs Vladimir adına İmperator Universitetinin (hazırda Taras Şevçenko adına Kiyev Milli Universiteti) tibb fakültəsində təhsil almışlar. Diplomatik nümayəndəliyin ikinci katibi Cahangir Həmzəyev 1910-1914-cü illərdə Müqəddəs Vladimir Universitetinin hüquq fakültəsində təhsil almış və sonra Kiyevdə qalmışdır.
Yusif Vəzir Çəmənzəminli
12 sentyabr 1887-ci ildə Azərbaycanın Şuşa şəhərində anadan olmuşdur.
1907-ci ildə Bakıya gələrək Bakı realnı məktəbinə daxil olmuşdur.
1910-cu ildə Kiyevdə Müqəddəs Vladimir adına İmperator Universitetinin (hazırda Taras Şevçenko adına Kiyev Milli Universiteti) hüquq fakültəsinə daxil olmuşdur.
1915-ci ildə birinci dünya müharibəsi səbəbindən universitetin Saratova köçməsi ilə əlaqədar təhsilini Saratovda davam etdirmiş, təhsilini bitirdikdən sonra Saratov məhkəməsində hakim işləmişdir.
1917-ci ildə Kiyevə qayıdaraq "Azərbaycan cəmiyyəti" yaratmış və cəmiyyətin sədri seçilmişdir.
Ukrayna Xalq Respublikası öz müstəqilliyini elan etdikdən sonra 1918-ci il 1 noyabr tarixində Azərbaycan Demokratik Respublikasının Ukrayna Xalq Respublikasında, eyni zamanda Krım və Polşada səfiri təyin olunmuş, lakin Ukraynada hakimiyyətin dəyişməsi səbəbindən Kiyevə gələrək vəzifəsinə başlaya bilməmişdir.
1919-cu ildə Azərbaycan Demokratik Respublikasının Nazirlər Şurasının sədri Nəsib bəy Yusifbəylinin sərəncamı ilə ADR-in Türkiyədə səfiri təyin olunmuşdur.
1943-cü ildə Nijni Novqorod vilayətində vəfat etmişdir.
Görkəmli Azərbaycan dövlət xadimi, yazıçı-publisisti olmuşdur.
Nazim Hüseyn oğlu İbrahimov
1963-cü ildə Naxçıvanda anadan olmuşdur.
1985-ci ildə Azərbaycan Politexnik İnstitutunu mühəndis-mexanik ixtisası üzrə bitirmişdir.
1997-ci ildə Azərbaycan Respublikasının Ukraynada fövqəladə və səlahiyyətli səfiri, daha sonra iqamətgahı Kiyevdə olmaqla Azərbaycan Respublikasının Moldova, Polşa və Belarusdakı səfiri təyin olunmuşdur.
2000-ci ildə Azərbaycan Respublikası Xarici ölkələrdə yaşayan Azərbaycanlılarla iş üzrə Dövlət komitəsinin, 2008-ci ildə Azərbaycan Respublikasının Diasporla iş üzrə Dövlət komitəsinin sədri təyin olunmuşdur.
